«Тӑван Атӑл» литературӑпа культура тата искусство журналӗ кӑҫал 90 ҫулхи юбилейне паллӑ тӑвать! Ҫак пулӑма халалласа кӑрлач уйӑхӗн 29-мӗшӗнче Чӑваш Республикин наци библиотекинче «Тӑван Атӑл» журналăн наци культуринчи вырăнĕ» ҫавра сӗтел иртӗ. Мероприятие паллӑ ҫыравҫӑсем, литература тӗпчевҫисем, журнал редакторӗсем, библиотека ӗҫченӗсем хутшӑнӗҫ.
«Тăван Атăл» 1931 ҫултан тухса тӑрать. Унӑн малтанхи ячӗ «Трактăр» пулнӑ. Ӑна Чӑваш пролетари писателӗсен ассоциацийӗ «литература, критика, политика альманахӗ» тесе кӑларма пуҫланӑ. 1936 ҫулта альманах ятне улӑштарнӑ, «Трактӑр» вырӑнне «Илемлĕ литература» пулса тӑнӑ. Хальхи ятне журнал 1944 ҫулта тивӗҫнӗ.
160 страницӑпа тухма пуҫланӑскер журнал хӑйӗн историйӗнче калӑпӑшӗпе сӑн-сӑпатне темиҫе хут та улӑштарнӑ, вӑл пач тухма пӑрахнӑ самантсем те пулнӑ. Тӗрлӗ ҫулта журналта паллӑ ҫыравҫӑсем, публицистсем – Леонид Агаков, Александр Алга, Пётр Хузангай, Яков Ухсай, Юрий Скворцов, Юрий Семендер, Николай Теветкел, Лаврентий Таллеров тата ыттисем пичетленнӗ. Паянхи кун «Тӑван Атӑл» – республикӑри чӑвашла тухса тӑракан пӗртен пӗр литература журналӗ.
Ҫавра сӗтелре чылай ҫивӗч ыйтӑва пӑхса тухма палӑртнӑ: журналӑн пуян историйӗпе кун-ҫулӗ, унӑн чӑваш литературинчи вырӑнӗ, ҫамрӑк ҫыравҫӑсене малалла аталантарас ӗҫри пӗлтерӗшӗ, пӗтӗмӗшле чӑваш литературин шӑпипе паянхи лару-тӑрӑвӗ.
Мероприяти онлайн мелӗпе библиотекӑн Youtube-каналӗнче иртӗ. Ыйтса пӗлмелли телефон 23-02-17, хуш. 145.
15.00 сехетре пуҫланать.