В. Давыдов-Анатри
Яковлева сума суса
Иван Яковлева манмастпăр,
Усратпăр халăх асĕнче.
Ăна сума суса юрлатпăр
Чăваш совет çĕршывĕнче.
Çын вăй-халне вăл çирĕп шаннă,
Пире вăл чĕннĕ çутталла.
Ăна Ульянов асăрханă,
Савса ал панă тăванла.
Вĕсем пĕрле тăрса çул хывнă
Ыр ĕмĕтпе - малашлăха.
Пĕрле тыр акнă, тырă вырнă,
Пĕрле çĕкленĕ туслăха.
Тавах сана, Раççей-аннемĕр,
Тавах, манмарăн эс пире.
Пĕрле пулнишĕн чун-чĕремĕр
Сана саватпăр ĕмĕрех!
Давыдов-Анатри, В. Яковлева сума суса : [сăвă] // Давыдов-Анатри, В. Сăвăсем / Василий Давыдов-Анатри. – Шупашкар, 1986. – С. 86.