Юрий Семендер: Поэзия. Чăвашах çĕршывĕн пикисем

Поэзия

Чăвашах çĕршывĕн пикисем –
Сывлăмах шăрçи иккен вĕсем:
Шурăмпуç пек çуттăн çуталсан
Кун килет хĕвеллĕн те тасан.

Чăвашах çĕршывĕн пикисем –
Ылтăн алăллă иккен вĕсем:
Ĕç тытсассăн ĕçĕ те ăнать,
Савăк юрă евĕр шăранать.

Чăвашах çĕршывĕн пикисем –
Çурхиех çеçке иккен вĕсем:
Тĕррисем чечек пек ешерсен
Туйăнать чечекĕн Чăваш ен.

Чăвашах çĕршывĕн пикисем –
Юрату юрри иккен вĕсем:
Юрату иленнĕ чĕрене
Çупăрлать асамлă çуркунне.

06.01.94

Сементер, Юрий. Чăвашах çĕршывĕн пикисем // Сементер, Юрий. Хуркайăк çулĕ / Юрий Сементер. – Шупашкар, 2002. – С. 163.