Юрий Семендер

Ирсем

Çап–сутă сывлăмлă ирсем,
Ялан сынна ыр сунакан,
Юна – чуна вăй хушакан
Таса ирсем,
Шупка ирсем,
Кам çуратать сире, ирсем?
Кам вăратать сире, ирсем?

Шăпчăк ыйхиллĕ шурăмпуç
Ир килессе ярать хыпар,
Хĕвел – ырми – канми кĕтўç –
Чĕнет пире: «Тăрар, тăрар,
Икĕ алла пĕр ĕç тытар...»
Выртсан инçе çулсем – йĕрсем
Тĕл пултăм сирĕнпе, ирсем,
Эп хĕвеланăç чиккинче,
Берлин таврашĕнче,
Римра, Крымра...
Анчах умра –
Кун – çулăм ирĕнчи ирсем:
Хĕмне çухатнă çăлтăрсем,

Çав шурăмпуç, çав çутă сывлăм,
Анне сасси: «Каяр пуль, ывлăм,
Анамăр юлĕ халăхран,
Ĕçлер халь, канăпăр кайран…»

Ирсем...
Кам пурăнăç пиллет сире?
Ирсем…
Кам чĕрĕлĕх кўрет сире?

Маншăн пулсан, эсир тухатăр
Тăр шывлă Шетмĕ хĕрринчен,
Каллех тĕнче тавра васкатăр
Тепре çĕн кун пуçланиччен.