Юрий Семендер

"Ĕнтĕ çĕр çаврăнать, çĕр çаврăнать …"

Ĕнтĕ çĕр çаврăнать, çĕр çаврăнать
Пуçăмăрти çавра çĕлĕк пек,
Пирĕнех те кунсем тавăрăнать
Вăй варринчи купăс пĕрми пек.

Çавăрăнса юхан Çавал шывне
Кам каçас пур ик хут пĕр тĕлтен,
Ыталанса çÿрен хура-шурне
Кам сирес пур умри çул çинчен?

Аттеех те аннен таса пилне
Мĕн виличчен асра тытар-и,
Ятлăях та ятсен чыс çĕклемне
Чун çăкĕ пек чипер йăтар-и?