Васьлей Митта

1908 - 1957

Чувашский поэт,
мастер художественного перевода

Çамрăк тăвана

Камшăн çуралтăн,

Юратнă тăван?

Чĕр вăйна камшăн

Хăюллăн хуран?

Мĕнле ĕçсемшĕн

Тĕрĕссĕн тăран?

Камшăн эс, камшăн,

Тăванăм, пурнан?

Çапла, тăванăм,

Эп санран ыйтсан

Мĕскер калĕ-ши

Ырă чĕлхӳ сан?

Мĕн тума тĕпчен

Манран çаксене?!

Ху та эс пĕлен

Манăн чĕрене.

Йывăр кунсенче

Анне çуратрĕ:

Тăшман айĕнче

Пăхса ӳстерчĕ.

Пиллерĕ мана

Вăйлă кĕрешме.

Усал тăшмана

Тĕппех пĕтерме.

Этем тăшманне

Пурпĕр пĕтереп!

Мулăн тымарне

Тĕппех сирпĕтеп!

Эп çак ĕçсемшĕн

Хăюллăн тăрап;

Хура халăхшăн

Чунтан тăрăшап.

Чăтаймасть чунăм

Тăшман пĕтмесĕр!

Çав хаяр мулăн

Пуçне çĕмĕрер!

1925

Митта, Ваçлейĕ. Çамрăк тăвана / Митта Ваçлейĕ. Çырнисен пуххи. Икĕ томпа тухать. I том. Сăвăсемпе поэмăсем / Ваçлей Митта. - Шупашкар, 2004. - С. 33.