Тав сана
П.Хусанкая
Кам тӳссе ирттерчĕ çынпа тан,
Кам ырра усал теме хăймарĕ,
Усала айваннăн пуç таймарĕ,
Çав калатăр пĕтĕм кăмăлтан:
Çамрăк ĕмĕр харама каймарĕ!
Пултаруллă тусăм, тав сана!
Эп кунта вун çичĕ çул пулмарăм,
Пуласса та, ахăрнех, сунмарăм,
Анчах та тивлетлĕ сăнарна
Чĕрĕ хальлĕн чĕремре упрарăм.
Вăй паратăн - ывăнса çитсен,
Сас паратăн - шухăша кайсассăн,
Е хĕвеллĕ çумăр пек ачашшăн
Ислететĕн чун типсе килсен...
Ахаль мар эп тайăлса каласшăн:
Чăвашсен пĕр лайăх сăмах пур -
Юлташ пултăр хăвăнтан маттур!
1957
Митта, Ваçлейĕ. Тав сана : П. Хусанкая // Митта Ваçлейĕ. Çырнисен пуххи. Икĕ томпа тухать. I том. Сăвăсемпе поэмăсем / Ваçлей Митта. - Шупашкар, 2004. - С. 109-110.