Васьлей Митта

1908 - 1957

Чувашский поэт,
мастер художественного перевода

Уяв

И лапка-лапканăн

Лăпкă юр çăвать,

Çĕр çине чăлт шурă

Кăкăрлăх çакать.

Тарлă, йăлăхтарнă

Канăçсăр çăва

Савăнса ăсатнăн

Сиккелет чакак.

Сарлака йăмранăн

Шилĕкĕ çинче

Чавкасен шăй-шайĕ

Çуйăхать пĕрмай.

Калăн, шурă вăхăт,

Калăн, шур тĕнче

Килнине чыслаççĕ

Сăрнайпа палнай.

Катан пир пĕркенчĕк

Уртнă çӳллĕ ту,

Ун тавра тухьяллă

Яхтă-чăрăшсем.

Калăн, хĕр сăрийĕ,

Калăн, çĕнĕ туй

Хускатма шутлаççĕ

Пĕлĕш-тантăшсем.

Тунсăхлă хăна пек

Пăхкалать хĕлле,

Куç хĕсет ачашшăн,

Кулкалать япшар.

Эх, кăмăлăм, кăмăл,

Кăмăлăм мĕнле!

Вăл паян çĕн юр пек

Тап-таса, шап-шар.

Эп выляп-кулатăп -

Çĕн вăхăт паян,

Савăнап-юрлатăп -

Паян кун уяв.

Ак халавлăн çитрĕç

Юрласа ян-ян

Хĕллепе Октябрь

Паянхи туя.

Ярапине янă

Савăк тĕнчене

Хĕрлĕ тĕс хастарлăн

Çавăрса илет. -

Эй, тухсам, ĕç çынĕ,

Тух, ялав чĕнет!

Санăн çеç паян кун

Илмелле тивлет!

Çиçĕмпе шăратнă

Пирĕн йăласем

Çимĕкрен илемлĕ

Сĕрентен чипер. -

Эй, кĕрле, ĕç халăх!

Ташлăр, ялавсем!

Паян кун пĕр харăс

Вăйсене виçер.

<Интернационалĕ>

Хаяр та йăваш,

Тапхăр-тапхăр тарăн

Çывлатса илет:

Ăншăртран сывалнă

Пирĕн пек чăваш

Паян кун туяннă

Танлăхлă тивлет.

Савăн, хапрăк-савăт!

Савăн, аслă хир!

Çĕнтерӳллĕ савнăç

Хулара, хирте.

Çак таса çĕршывăн

Хуçисем эпир,

Çак тĕнчен йĕвенĕ

Паян кун пирте!

И лапка-лапканăн

Лăпкă юр çăвать.

Ял хушши йăл-ялăн

Ялавпа çунать...

1926

Митта, Ваçлейĕ. Уяв / Митта Ваçлейĕ. Çырнисен пуххи. Икĕ томпа тухать. I том. Сăвăсемпе поэмăсем / Ваçлей Митта. - Шупашкар, 2004. - С. 53-54.