Тӑван чӗлхе

Эп, радиопа атом ӗмӗрне те
Ҫитсе кӗмешкӗн ӗлкӗрнӗ этем,
Чӗлхе тӑванлӑхне курасчӗ тетӗп:
Пӗрне-пӗри ӑнланччӑр халӑхсем.
Философӑн, поэтӑн е ҫулпуҫӑн
Сӑмахӗ ҫиттӗр пур илемӗпе,
Пур вӑйӗпе ҫиҫсе вылятӑр уҫҫӑн –
Хӗвел пек, ҫил пек, ҫумӑр пек, – теп эп.
Ҫапах та – халлӗхе мӗн паллаштарчӗ
Мана ҫак ешӗл курӑкпа, ҫӗрпе?
Ҫак пӗлӗт ҫӳллӗшне мӗн ӑнлантарчӗ? –
Тӑван чӗлхе! Ҫав пулчӗ тӗкӗр пек.
Килте, ютра-и эп – кирек ӑҫта та,
Кирек хӑҫан та тав тӑвап ӑна:
Чӗлхем! Санпа тӗнче уҫҫи тытатӑп,
Шухӑшлама вӗрентрӗн эс мана.

П. Хусанкай